"تیژەنگ"ی دوو هەرچەند لە بەهار دا هاتە بەر دەست، بەڵام کۆرپەی بەفرانبارە. بەفرانباری ڕابردوو، بەفرانباری هەستان و خرۆشانی ئەوانەی دەمێک ساڵە پێشێل کراوی ئەو دۆخەن و لە پەراوێزدا قەتیس کرابوون و دەیان و سەدان دەزگای ڕاگەیاندن و رۆژنامەوان و "رۆشەنبیر" ئەوانیان توانا بە بەڕێوەبەری خۆیان نەدەزانی، نەک هەر توانا بەڵکو تەنانەت لە ئاستی "فام"یشدا بەدیان نەدەکردن.
تیژەنگ‌ی دوو دەگەڕێتەوە بۆ بەفرانبار و هەر لە بەفرانباریش دا دەمێنێتەوە و مژدە دەدا کە بەهارێک بوونی نیە مەگەر ئەوەی کە لە وەها بەفرانبارێک دا هەیمەنەی سەهۆڵبەندان شکابێت و ئەوکات بەهار بەهاری هەموومانە!
لە "تیژەنگ"‌ی دوو دا ئەردەڵان باستانی گەڕاوەتەوە بۆ بانە، بانەی گەشتیار و پاساژ نا بەڵکوو بانەی کۆڵبەران و دەسفرۆشان و بانەی ڕاپەڕیو لە ستەم!
ڕامیار حوسەینی و لاوێن ئەمانی چاویان خشاندوە بە سەر شاڕلاتانەکانی شار دا، ئەوانەی لە دوای دووی جۆزەردانە درۆیینەکە ڕوویان لە کوردستان کرد و دەستیان کرد بە غوسڵ دانی پیاوکوژانی دوێنێ و بەرگی "ئەولیا"یان لە بەر کردن.
هیوا سەلیمی باسی شەپۆلەکانی ئێعتراز دەکا لە بەفرانبار دا و گەڕاوەتەوە بۆ لای ئەوانەی لە بەفرانبار دا هاتن و کەلەبەریان لە نێوان دوێنێ و ئەوڕۆ ساز کرد و نیشانیان داین ئاسۆیەکی نوێ هەیە.
ئاڕوین سەعیدپوور و ڕامیار حوسەینی لە گەڵ توراب سالێس وتووێژیان کردوە سەبارەت بە بزووتنەوەی کرێکاری و داهاتووی ئەو بزوتنەوەیە لە ئێران. هەروەها باسێک لە سەر مافی دیاری کردنی چارەنووس.
شاعیری "زولفا" و "گۆمەشین" شێعرێکی بۆ تیژەنگ ناردوە بۆ کۆڵبەران. ئەحمەد بازگر لەو شێعرەدا داهاتوومان نیشان دەدا، داهاتوویەک کە مناڵان جیهانێکی کە دەبینن.
لە "تیژەنگ‌"ی دوو دا دوو چیرۆکی کورت لە "عەلی ئەشرەف دەروێشیان" کراوەتە کوردی.

"تیژەنگ"ی دوو لێرە داگرن

tizhang2